Your Cart
Infiniti C6 1 e1606660121314

生酮搵嘢食之Infiniti C

 

生酮搵嘢食之Infiniti C

今日心血來潮忽然好想食蛋糕我同老公講,一係比我係觀塘食凡人千層蛋糕($35)一係出尖沙咀比我食infinite c 生酮蛋糕($88)估唔到老公寧願山長水遠去課金都唔比我破酮😂😂 可能見我前排破酮破到頭暈暈驚左🤣😜

星期六既下午茶時段,去到人山人海要排隊入坐,心急既我就直接買外賣返去慢慢嘆就算。太耐無黎,生酮蛋糕款式比開業初期多左3-4款,今日就試左New York cheese cake同埋 Earl Grey cream cake.

New York cheese cake 濃厚又滑身既芝士主體實在太好味!蛋糕上層用少許cream cheese 同埋忌廉打成再舖面,打得夠滑好好食!最驚喜🤩係蛋糕餅底竟然可以做到真餅乾底既質感!成個蛋糕唯一缺點係after taste 對我黎講太勁,食完喉嚨有啲涼。

New York cheese cake 質素:
賣相:⭐⭐⭐⭐⭐
口感:⭐⭐⭐⭐⭐
味道:⭐⭐⭐⭐
價錢:⭐⭐⭐ (價錢略貴但對得起質素)
分:17/20

Earl Grey cream cake 食落淡淡earl grey味道,甜度適中。海綿蛋糕主體係infinite 既皇牌,好多生酮烘焙店係做唔到咁鬆軟既質感,絕不會跟麵粉做的凡人蛋糕比下去。要用動物性忌廉打至企身放係蛋糕上面唔溶,其實都有一定難度。另外將忌廉平滑地舖上蛋糕,亦需要一定技巧。如果大家有自己做過凡人同埋生酮蛋糕就會明白我講乜。一般植物性忌廉因為加左好多穩定劑、乳化劑係好容易發起,亦好容易批到平滑。但動物性忌廉只係加左鹿角菜膠,難度亦會高好多!但味道亦會好食好多!同樣地,今次件earl grey cream cake 都有些少after taste 但無new york cheese cake咁利害,可接受。

Earl grey cream cake 質素:
賣相:⭐⭐⭐⭐ (返到屋企件蛋糕有少許傾斜)
口感:⭐⭐⭐⭐⭐
味道:⭐⭐⭐⭐
價錢:⭐⭐⭐ (價錢略貴但對得起質素)
總分:16/20

其實而家一啲出品較精緻既凡人蛋糕,一件都60蚊起跳,而生酮蛋糕既用料成本分分鐘係一般蛋糕既5-10倍。所以我地唔應該只係睇價錢,仲要諗埋食入口係啲咩,對身體副面影響大唔大🤔今次食Infinite C既生酮蛋糕,食到係餅師既手藝、對食材既了解運用、最重要當然係好味啦!🤤🤤🤤食完滿滿幸福感❤️❤️❤️

發佈留言